১.
ঘরে হাসে, ঘরে কাঁদে
ঘরে মানুষ তোয়ায়
সুন্দর ঘরগান ছাড়ি গেলগই
আঁ-র উগ্গা ফোয়ায়।
২.
আঁরে তুই কেনে ফাবি
আকাশ-বাতাস বিচারি
ঘররে তুই খাঁচা ভাবি
উড়াল দিয়স ঘর ছাড়ি।
৩.
শঙ্খ যদি খাইতো আঁরে
পাইতি পানির তলাত্
তোর বুকত শব্দ অইতু
গাঙর ছলাত্ ছলাত্
৪.
দুই-একখান ইট-লোয়া দি
বানাইত পারস বাসা
পাখির নানি আন্ডা ফারি
ফুরা মনর আশা।
ন পাইবি তুই ঘরর সুখ
ন যাইবো তোর মনর দুখ।
৫.
তোরে আঁই আগলাই রাইখখুম
আঁচল দি আঁ-র বুক বেরাই
ঘুমর ভুতুর খোয়াব দিয়ম
আন্ধা মনর চোখ ছাড়াই
৬.
চান্নি ফরত দুনিয়া ভাসের
খুশবু-মাখা ফুইটটে জুঁই
সত্যপীরর কসম লাগে
আঁরে ছাড়ি নযাইসগুই
৭.
মেডির উদ্দি বুকখান লাগাই
চুপপে যারগই হাপ
সাধর উডান বিরান হইয়ে
ঘরর অভিশাপ।
৮.
কবরর নান আওয়াজ ছাড়া
নিঝাপ ঘরগান ঠান্ডা
কন দেশত্তুন উড়ি আই
খুলে পাড়ের আণ্ডা?
৯.
দিন ফুরাইলে চান্নিফর
আসমানত চাঁদর ঘর
কিল্লাই হাঁদো রাইতভর
তোঁয়ার বুকত কিউর ঝড়
ধূ ধূ গরের বালুর চর
আপন মানুষ অইল পর
